رجعت تاني للدنيا والتدوين ده حاجة،كمان إللى بحصل اليومين دول في مصر يخلي العقل يطير بجد مش هزار سيبك من كل الكوارث إللى عماله تحصل دى بس ركز شوية معايا في تدنى مستوى الثقافة والفهم لدى العامة ومش قصدى عامة يعني ناس تحت لأ.
ناس أهملت العقل والتدبير وصارت خلف الخرفات والأشياء الواهية بجد بعد يوم شاق وأنا بعمل المدونة النهاردة وبتصفح Facebook
فحبيت بس أقولكم عليه وإنتوا أحرار طبعاً منكم إللى وإللى وإللى بس كل واحد حر وأنا كمان حر..........
الصورة دى نقلاً عن مدونة دنيا الحريم
انت مش محجبة .. اذن انت في منتهى السعادة
الجروب ده هدفه ايصال فكرة لكل واحدة مش محجبة ..
علشان تعرف قد ايه هي محظوظة بعدم لبسها الخيمة المقدسة المسماه بالحجاب و اللي انتشر في الفترة الأخيرة نتيجة لإنتشار الخرف الديني في مصر و الذي ساهم في نشره عرارير مملكة العرر اللي جنبينا بنت بلدي ...
أنت محظوظة جدا لو انت مش محجبة وذلك للأسباب الأتية:
أولآ :- في الحر مش هتفطسي او هيبقى عرقك مرقك وتنشعي بريحة مش ظريفة في اي مكان وبالتالي هتتجنبي الاحراج والفرهدة.
ثانيآ :- هتقدري تنقي هدومك بسهولة من غير ما تفتحي كاتالوج المحظورات الدينية اياه بتاع النص كم حرام والجينز مش عارف ايه و الكلام المهلبية ده.
ثالثآ :- مش هتشغلي بالك بحط 3 او 4 طبقات من القماش فوق بعض على دماغك في 3 ساعات علشان تنزلي من بيتك تجيبي حاجة من على اول الشارع.
رابعآ :- هتخلصي من العرسان المتخلفين اياهم اللي بيقيموا سلوكك و درجة احترامك من كونك محجبة وبالتالي شريك العمر قد يكون اكثر ذكاء.
خامسآ :- هتخللي شعرك يتنفس و يشوف الشمس و تقل معدلات اصابتك بالحساسية و الأرتكاريا.
سادسآ :- فرصتك للعمل في اي مكان هتكون اكتر لأنك واثقة في نفسك اكتر .. مش هتستخبي جوة الملاية !بنت بلدي ... إنت اجمل و أحلى بكتير من اي خيمة متحركة تانية حواليكي لأنك الأنثى في شكلها الطبيعي الجميل الواثقة من نفسها و متخلليش حد يملى دماغك بشباك.
العنكبوت .. ولو محجبة هي اللي بتنصحك فهي في "سجن" و عايزاكي معاها جوة !! إنتي الاصل و هما اللي عايشين وهم كبيير ... عيشي حياتك !... إنت مش محجبةاذن إنت حره جميلة !! وفي منتهى السعادة.
ملاحظة هامة :
مؤسسي الجروب ده و اعضاؤه كلهم من معارضي فكرة الحجاب شكلآ وموضوعآ ... يعني احنا مش مستنين هداية حد ... ولا حد يقعد يرغي و يزبد في الاحكام و موضوعية الحجاب... احنا بنكره ومبنحبوش و خلاص و احنا مبسوطين كده ... و زي ما فيه ناس بتشوف الغير محجبة انسانة منحللة و سافرة وخليعة ....الخ, إحنا بقى شايفين العكس تماما و كل واحد حر ومش طالبين من اي حد مش عاجباه فكرة الجروب او اهدافه, انه يدخل يقل ادبه او يسب او يخل بالنظام لأي سبب ... ولو مش عاجبك الجروب او ما يناقشه يبقى بالسلامة من قبل ما تدخل ... ودوّر على جروب تاني يناسبك علشان تهاجم فيه او تقف جون ... دي مشكلتك مش مشكلتنا.